blog de los berrones

EMPECIPIA'L CHOW

2009-05-09T07:09:00.000-07:00

Atentu'l personal, el día 15 en Piedres Blanques echamos a andar el cursu músicu-festivu 2009.
Esperamos que teis toos en plena forma pa roblincar tola nuechi.
Como ya sabreis, tamos en plena grabación del discu asina que aprovecharemos el conciertu p'adelantavos algún canciu nuevu, pa ver qué vos paez ...

CONFIRMADA FECHA GRABACIÓN

2009-04-04T06:31:00.000-07:00

Pues, sí. Por fín ya tenemos fecha pa empezar la grabación nos Estudios Acme con Miguel Herrero. Esti personaxe (además de un músicu de cagase, ye hasta buen rapaz) fue col que grabamos el "República Independiente de Tolivia", con él entendémosmos bien y fijo que sal una producción bien curiosa.
Por supuestu, na grabación del discu participen Julio y Chema, y seguro que Miguel mete alguna cosuca...
Asina que el día primeru de mayu celebrarémoslu entrando nel estudiu cola mesma ilusión de fae 20 años.
Nun se si reparastes na fecha... El nuestru primer L.P. "Voi dicítelo" publicóse en Mayu de 1999...

NOVEDAES PRIMAVERALES

2009-03-28T08:44:00.000-07:00

Hola xente, vamos a intentar poner el blog a furrular y que tengáis puntual información de les coses que van saliendo.
Aunque somos enforma folgazanes pa esto de la web (Too nesta vida nun ye internet: hai vida más allá de la rede!!) queremos esforzamos pa que tengais les novedaes lo más rapido posible.
Pues a ello: pa finales d'abril, y antes de que los gurriones salgan del güevu, vamos ponemos cola grabación del nuevu discu, esta mesma semana vamos cerrar les feches col estudiu y llanzamos en barrena...
Per utru lláu, ya tenemos dellos de conciertos confirmaos:
15/05/09 Piedres Blanques, Castrillón
11/07/09 LLantones, Xixón
01/08/09 Santullano, Les Regueres
14/08/09 Corao, Canges d' Onís
16/08/09 Molléu, Sieru

Na más que haiga más confirmaos, pondrelos equí.

VAMOS PA GALICIA

2007-09-01T08:45:00.000-07:00

EL 8 SETIEMBRE TOCAMOS EN FONSAGRADA (LUGO) EL QUE QUIERA DIR PER ALLÍ TA CONVIDÁU A UNA CACIPLA Y UN PLATU ACEITUNES...

FOTOS CONCIERTU DE NAVA

2007-07-21T03:46:00.000-07:00

Aquí tenéis unes poques fotos del conciertu de Nava d'esti añu. Por cortesía de Raúl, el de Secadura (Cantabria) que tuvo la delicadeza de mandámosles. ¡Gracies, ho! Pinchái equí: http://es.pg.photos.yahoo.com/ph/cascayu17/album?.dir=/d399re2&.src=ph

SUSPENDÍO LO DE RIBESELLA

2007-07-21T03:17:00.000-07:00

Al paecer fue imposible facer el conciertu en Ribesella. Hubo problemes pa facese col escenariu. Habrá que posponer la fecha pa más alantre...
¡Disculpái les molesties! Nesti casu somos ayenos dafechu.

ACTUALIZACIÓN XIRA 2007

2007-07-05T03:57:00.000-07:00

Tenemos confirmaes nueves feches, asina que el calendariu queda:
6 xunetu Nava
21 xunetu Ribesella
17 agostu Villamartín del Sil
18 agostu Barru (LLanes)
31 agostu Moreda
10 setiembre Corvera

EL SÁBADU 9 DE XUNU NA VEIGA

2007-06-05T12:38:00.000-07:00

Esti sábadu taremos dando berríes pel occidente. Será en A Veiga, Vegadeo, y cuntamos con tolos colegas de la zona na primera fila roblincando como robecos. Aprovecharemos pa tomar una cacipla con la xente de "la fala" que va un par de años que nun tenemos ocasión de velos...

"TOTALMENTE CONFIRMADO..."

2007-05-20T01:49:00.000-07:00

Pues, sí. Confírmase que el prósimu xueves 24 de mayu tocamos na plaza l'Ayuntamientu de la Pola (LLaviana) .
Será pa finar un actu de I.U. Bloque, Los Verdes. Tocaremos hacia les 21 h.

XIRA 2007

2007-04-26T14:32:00.000-07:00

YA TA ARMÁ...EMPIEZA OTRA TEMPORADA... Y YA TENEMOS DELLOS DE CONCIERTOS CONFIRMAOS:
6 XUNETU NAVA
17 AGOSTU VILLAMARTÍN DEL SIL
31 AGOSTU MOREDA
10 SETIEMBRE CORVERA
SEGÚN VAYAN CONFIRMÁNDOSE MÁS, DIREMOS PONIÉNDOLOS NEL BLOG.
TAMIÉN ADELANTAMOS QUE PA LA SERONDA GRABAREMOS NUEVU DISCU. AHORA MESMO TAMOS ESCURRIENDO NUEVOS TEMES...
QUE NUN DECAIGA LA MOVIDA BERRONIL!!!!

EMPIEZA EL CHOW

2007-03-17T08:05:00.000-07:00

EL PRÓSIMU 7 D'ABRIL ESTRENAMOS LA XIRA 2007.
SERÁ EN SECADURA, NA COMUNIDÁ CÁNTABRA. COMO YA SABÉIS CASI TODOS/ES TANTE YA NUN TÁ CON NOSOTROS.
PERO SEGUIMOS EL RESTU COL MESMU PUXU DE SIEMPRE, COL ENFOTU DE FACER DE LOS BERRONES UN GLAYÍU MÁS ESCONTRA L'ABANDONU DE LA CULTURA Y LA LLINGUA NUESTRA, LOS PELOTAZOS URBANÍSTICOS, LA DESIDIA COL MUNDU RURAL, LA MEZQUINDÁ DE LOS QUE MANDEN, LO BORREGOS QUE SOMOS, LA VUELTA AL MEDIEVO DEL PAPA, ......

CONCIERTU N'AVILÉS

2006-11-11T16:55:00.000-08:00

El postrer conciertu de la temporada 2006 tendrá llugar el 29 de payares (noviembre) nel auditoriu de la Casa de Cultura d'Avilés a les 20:15 hores. Será la segunda vez nesti añu (l'anterior foi en Sama) que se fai un conciertu en plan "íntimu", con tola xente sentao y con unes condiciones de trabayu mui afayadices: nun se depende de si llueve o non, de si l'aire va a espiazar l'escenariu o de si hai qu'esperar a qu'acabe la misa o coses pol estilu. Nestos sitios zarraos pue probase'l soníu tranquilamente, hai camerinos y, como dicen los del teatru, hai un contactu más directu col públicu. Ye verdá que nun habrá la presión sonora de sitios amplios como en Poniente nin xente echando sidra y dando blincos nes primeres files; pero ye que tamién presta ver un conciertu sentaos tranquilamente percibiendo, quiciaes, munchos detalles que s'escapen nes actuaciones en sitios grandes y al bentestate. La calidá del soníu ta garantizada col equipu nuevu de Musical Marcos, que suena de maravilla... Asina que sólo falta que los deos de los guitarristes se pongan siempre nel sitiu, que'l batería maye como tien que mayar, que'l cantante coma güevos p'aclariar el gargüelu y que naide estroce un cable al pisalu cola madreña.

BERRONES ENSIN CORRIPA TOUR 2006

2006-07-13T11:41:00.000-07:00

GALES BERRONES 2006

9 de setiembre: Morcín (Asturies). El que prueba con nosotros, repite. Anque nun haiga quesu de pol mediu...

15 de setiembre: Cabranes (Asturies). Si nun vien otru huracán y marcha con too.

30 de setiembre: Llangréu (Asturies). Teatru de Llangréu.

Hai pendientes delles feches más, que nun ponemos hasta que nun ten perfeutamente confirmaes, pa evitar mal entendíos y eso...

Vídeos de Berrones en youtube.com

2006-05-17T10:33:00.000-07:00

¡Desde'l Pub Blue Moon de La Pola Llaviana pal mundu mundial!

Gracies al trabayu entusiasta y desinteresáu d'un collaciu de Llaviana yá tenemos dellos vídeos engolaos n'internet pa que la xente los puea ver en tol planeta y se faiga una idea de lo que ye esto. Como yá se dixo n'otros llaos, l'agro-rock sería'l rock fechu por xente que vive en zona rural y que toma los temes directamente de la realidá na que vive. Por eso, nun ye imprescindible que toles canciones traten de la yerba o del ganáu, sinón de cualisquier tema (eso sí, enfocáu dende'l puntu de vista del que vive nun pueblín y non en Madrid o en Londres). Los Berrones toquen, amás de temes rurales, dellos temes de l'actualidá (la televisión, la política, la inmigración, los problemes cotidianos... y hasta l'amor, si se tercia).
Podemos ver el vídeo de calcar na tená (de 1998) que lleva yá más de 6000 visites; el de fai deporte (de 2004) recién colgáu, nel que vemos a un balagar de deportistes asturianos xunto colos Berrones y l'árbitru Mejuto; y tamién unes imáxenes d'un proyeutu de serie de dibuxos animaos basada nel llibru de Tante Blanco Hestories piquiñines. Hai más coses:

"Fai deporte", Premiu de l'Academia de la Música a la meyor canción n'asturianu

2006-05-08T09:29:00.000-07:00

Ye'l tercer añu que se da esti premiu nesta categoría na que, por cierto, compiten más obres que en gallego o en valenciano. Y ello ye que cada añu hai una producción pergrande de música y de lliteratura n'asturianu, y eso teniendo en cuenta'l tamañu y la población del Principáu. Ye un llogru importante que se reconoza a nivel nacional la esistencia y el valir de la música asturiana pero tamién sería d'agradecer que nun haiga discriminaciones y que cada modalidá tenga'l mesmu tratu. Nun ye de recibu qu'unos premios se den nel escenariu como si fueren los "oscars" y el galardonáu de turnu suelte'l discursín d'agradecimientu mientres qu'otros premios s'entreguen nel patiu de butaques pa nun perder munchu tiempu y, de pasu, evitar que daquién pueda decir cualisquier "inconveniencia". Per otru llau l'Academia nun debería olvidase d'avisar a los finalistes del llugar y la fecha de la entrega de premios y, yá que nun paguen el viaxe, manda-yos una invitación curiosina (pa que puedan decidir si van o non, mayormente). Nun sé si esta xente sabe que munchos músicos tamién trabayen y tienen responsabilidaes como tou dios. Imaxináivos qu'apaez en Madrid ún de los posibles premiaos y nun lu dexen entrar a la gala porque nun lu conocen y nun trae invitación. Por exemplu, llega Sabina un poquiñín desataviáu porque pasó una mala nueche (como diz él: "fui malu") y resulta que'l porteru cree que vien a pidir y échalu fuera.
Como se sabe, los Berrones nun fueron a recoyer el premiu y nun se sabe si-yos lu mandarán por corréu o por SEUR o si-yos lu van quitar.

L'agro-rock crea escuela

2006-05-02T14:24:00.000-07:00

Paez ser qu'esti tipu de música va espardiéndose, yá que cada ciertu tiempu apaecen grupos nesa onda. Hai grupos "agro" na Comunidá Valenciana, n'Andalucía, en Baleares y hasta en Portugal y eso pue ser bueno pa toos... igual ye esportable al restu'l mundu. Yá actuaron Los Berrones l'añu pasáu nun Festival d'Agro-Rock en Cantabria y fai dos años n'otru en San Agustín (Ibiza)... y eso ensin cuntar cola pila d'actuaciones que, en toos estos años, fixeron nun sitiu y n'otru, n'ambientes rurales dafechu.
Normalmente a los grupos nun-yos gusta que-yos pongan etiquetes y menos tovía ponéseles ellos mesmos. Los Berrones sí que se punxeron la etiqueta d'agro-rock allá pel añu 1987 y adoptaron como emblema la guitarra y el garabatu cuando (mediu en broma, mediu en serio) entamaron a tocar per Asturies. Diéronse cuenta de que les sos canciones trataben temes rurales (la yerba, el ganáu, personaxes de los pueblos...) y tamién temes d'otru tipu, anque dende'l puntu vista de quien vive nun pueblín y non na gran ciudá. Yá hacia l'añu 1980, cuando ensayaben colos tambores de deterxente y la guitarruca de tómbola salieron canciones de tema "agro" como La de les vacaciones, La de de Sindo'l cabreru, La del borrín, etc. A finales de 1988 grabóse'l primer single, que llevaba puesta la etiqueta "agro-rock". Daquella los periódicos asturianos publicaben cada poco noticies o entrevistes con Los Berrones y dáben-y muncha relevancia a esa etiqueta mientres que'l propiu grupu siguía tomándoselo en broma, yá que pensaben que la etiqueta yera lo de menos. Pero pasaron años y vemos qu'hai grupos que d'una manera o d'otra s'identifiquen col agro-rock o qu'afirmen ser los inventores. Ensin pretender polemizar sobre l'asuntu, esto ye un poco como si cada nuevu grupu heavy s'atribuyere l'inventu de la distorsión o de la cazadora de cuero. Caún podrá tener la so propia personalidá y el so estilu más o menos definíu pero'l que crea qu'inventó daqué cosa nun fadría mal en comprobar si tal cosa yá la fixo daquién enantes.

Finalistes nos Premios de la Música

2006-03-12T14:53:00.000-08:00

Los finalistes pa la meyor canción n'asturianu de los Premios de la Música 2006 son:
Fai deporte, de los Berrones; El café del pescador, de Vicente Díaz; Somos, de Dixebra. Pa más información calca equí.
La canción Fai deporte grabóse con motivu de la gala que los deportistes asturianos cellebren cada añu per Navidá n'Uviéu. Oviedo TV atropó a los más destacaos deportistes asturianos pa que participaren na grabación y la cosa salió enforma bien, asina que tamién se fexo un videoclip nel que salen los susodichos debutando comu cantantes. Podemos ver na foto a dellos ciclistes con Tante nel mediu (avientu de 2005).

¡Qué tiempos!

2006-02-12T02:20:00.000-08:00

Esta ye una foto de les primeres entrevistes que vinieron a facemos a Tolivia. Yera pa una revista de la universidá y tabemos ensayando nes escueles del pueblu.

Esti ye'l blog de Los Berrones

2006-01-26T11:54:00.000-08:00

Equí diremos espublizando toles novedaes, artículos, curiosidaes... y cualisquier cosa que mos apeteza cuntar. Pue tamién dise al primer periódicu dixital de Tolivia. Pondremos semeyes, dibuxos, enllaces a otres páxines "güe"... ¡y lo que se tercie! Equí habrá coses que son verdá y otres que podríen selo.