L'agro-rock crea escuela

Paez ser qu'esti tipu de música va espardiéndose, yá que cada ciertu tiempu apaecen grupos nesa onda. Hai grupos "agro" na Comunidá Valenciana, n'Andalucía, en Baleares y hasta en Portugal y eso pue ser bueno pa toos... igual ye esportable al restu'l mundu. Yá actuaron Los Berrones l'añu pasáu nun Festival d'Agro-Rock en Cantabria y fai dos años n'otru en San Agustín (Ibiza)... y eso ensin cuntar cola pila d'actuaciones que, en toos estos años, fixeron nun sitiu y n'otru, n'ambientes rurales dafechu.
Normalmente a los grupos nun-yos gusta que-yos pongan etiquetes y menos tovía ponéseles ellos mesmos. Los Berrones sí que se punxeron la etiqueta d'agro-rock allá pel añu 1987 y adoptaron como emblema la guitarra y el garabatu cuando (mediu en broma, mediu en serio) entamaron a tocar per Asturies. Diéronse cuenta de que les sos canciones trataben temes rurales (la yerba, el ganáu, personaxes de los pueblos...) y tamién temes d'otru tipu, anque dende'l puntu vista de quien vive nun pueblín y non na gran ciudá. Yá hacia l'añu 1980, cuando ensayaben colos tambores de deterxente y la guitarruca de tómbola salieron canciones de tema "agro" como La de les vacaciones, La de de Sindo'l cabreru, La del borrín, etc. A finales de 1988 grabóse'l primer single, que llevaba puesta la etiqueta "agro-rock". Daquella los periódicos asturianos publicaben cada poco noticies o entrevistes con Los Berrones y dáben-y muncha relevancia a esa etiqueta mientres que'l propiu grupu siguía tomándoselo en broma, yá que pensaben que la etiqueta yera lo de menos. Pero pasaron años y vemos qu'hai grupos que d'una manera o d'otra s'identifiquen col agro-rock o qu'afirmen ser los inventores. Ensin pretender polemizar sobre l'asuntu, esto ye un poco como si cada nuevu grupu heavy s'atribuyere l'inventu de la distorsión o de la cazadora de cuero. Caún podrá tener la so propia personalidá y el so estilu más o menos definíu pero'l que crea qu'inventó daqué cosa nun fadría mal en comprobar si tal cosa yá la fixo daquién enantes.