"Fai deporte", Premiu de l'Academia de la Música a la meyor canción n'asturianu

Ye'l tercer añu que se da esti premiu nesta categoría na que, por cierto, compiten más obres que en gallego o en valenciano. Y ello ye que cada añu hai una producción pergrande de música y de lliteratura n'asturianu, y eso teniendo en cuenta'l tamañu y la población del Principáu. Ye un llogru importante que se reconoza a nivel nacional la esistencia y el valir de la música asturiana pero tamién sería d'agradecer que nun haiga discriminaciones y que cada modalidá tenga'l mesmu tratu. Nun ye de recibu qu'unos premios se den nel escenariu como si fueren los "oscars" y el galardonáu de turnu suelte'l discursín d'agradecimientu mientres qu'otros premios s'entreguen nel patiu de butaques pa nun perder munchu tiempu y, de pasu, evitar que daquién pueda decir cualisquier "inconveniencia". Per otru llau l'Academia nun debería olvidase d'avisar a los finalistes del llugar y la fecha de la entrega de premios y, yá que nun paguen el viaxe, manda-yos una invitación curiosina (pa que puedan decidir si van o non, mayormente). Nun sé si esta xente sabe que munchos músicos tamién trabayen y tienen responsabilidaes como tou dios. Imaxináivos qu'apaez en Madrid ún de los posibles premiaos y nun lu dexen entrar a la gala porque nun lu conocen y nun trae invitación. Por exemplu, llega Sabina un poquiñín desataviáu porque pasó una mala nueche (como diz él: "fui malu") y resulta que'l porteru cree que vien a pidir y échalu fuera.
Como se sabe, los Berrones nun fueron a recoyer el premiu y nun se sabe si-yos lu mandarán por corréu o por SEUR o si-yos lu van quitar.